Full text:
ALLELUIA Fons praeclarissimus et praedulcissimus exit de monte | Ad hunc deveniens aquila sitiens dormit in fonte | In fonte dormiens inde transglutiens purum liquorem | Propinat omnibus electis avibus mirum dulcorem | Solatur flebiles et sanat debiles dulcor mirandus Et corda effera mulcet et aspera dulcor laudandus | Haec est parabola Johannes aquila et Christus fons est | Venit fons fontium a monte montium nam pater mons est | Mons fertilissimus excellentissimus et generalis | A quo sunt omnia et sapientia coaeternalis | Sibi est fluvius ipsius filius praecordialis | Ex his paraclitus procedit spiritus et coaequalis | Patri et filio et hic est unctio medicinalis | Hanc celsitudinem trinitatis in pectus dormiens veritatis | Hausit de flumine pietatis Johannes lilium castitatis | Ob hoc persimilem confertur aquilae Ad thronum aetheris quae volat ceteris Altius avibus et praeest omnibus | Et suos oculos in solis radios | Figens acutius videt subtilius | Sic est Johannes hic exaltatus sole justitiae perlustratus Quod est theologus appellatus in Christo gremio soporatus | Altius ceteris contemplatus Deum a quo fuit sic amatus | Quod ad hoc matri est custos datus o quam fuit iste Deo gratus cui thesaurus est hic commendatus | O quam fuit hujus sancta vita cui commissa est talis margarita | Nunc ad theologum convertamur rogantes hunc cui famulamur | O custos virginis specialis Johannes casta res spiritalis | Fac gemmam lucidam nos videre quam scimus aliis praelucere | Et ista dicitur maris stella quae sola mater est et puella
Notes:
No melody to the alleluia. Ms: 3a and b both close with laudandus (not edited, probably an error)
8a persimile / persimilem
10b Both Pro 12 and Ch 520 (40r) have Quod ad hoc matri est custos datus (not in AH),
12a Both Pro 12 and Ch 520 (40r) have O custos and in 13 Et ista..
